Təqlid məsələləri – Şəriət hökmləri.

Sual:
Niyə müsəlmanlar  Müctəhidə təqlid etməlidirlər?

Cavab:
Əvvəlcə qeyd etmək lazımdır ki, təqlidin vacibliyi yalnız dinin ikinci dərəcəli hökmlərinə (füruu’d-dinə) aiddir. Dinin əsas hökmlərində (usulu’d-din-də) təqlid qadağandır. Dinin ikinci dərəcəli hökmlərində təqlidin vacibliyinə dəlil olaraq imamların hədisləri və həmçinin ağılın hökmü göstərilir. Çünki ağıl bizə deyir ki, müəyyən məsələlərin həllində məlumatı olmayan şəxs həmişə məlumatlı və alim bir şəxsə müraciət etməlidir. Necə ki, xəstələr öz xəstəliklərindən şəfa tapmaq üçün onları müalicə yollarını bilən və bu sahədə mütəxəssis olan həkimlərə müraciət edir, və ya məsələn maşınımız xarab olduqda onu mütləq yaxşı bir mütəxəssis usta yanına aparmalı oluruq və s..

Qadın Müctəhidin təqlid məsələsi.
Sual:
Bildiyimiz kimi, əgər bir şəxs müctəhid olsa, onun başqa bir müctəhidin fətvalarına təqlid etməyə haqqı yoxdur, icazəli deyil. Bəs əgər qadın müctəhid olsa, ona da başqa bir müctəhidin fətvalarına təqlid etmək qadağandırmı?

Cavab:
Bu məsələdə kişi ilə qadın arasında heç bir fərq yoxdur. Onlardan hər kim ictihad dərəcəsinə çatsa, müctəhid olsa, ona başqa bir müctəhidin fətvalarına təqlid etmək qadağandır, caiz deyil.